Num 21 | NdeIBE | STEP | Kwathi inkosi yase-Aradi engu-mKhenani eyayihlala eNegebi isizwa ukuthi u-Israyeli wayesiza ehamba ngomgwaqo eqonde e-Atharimi, yabahlasela abako-Israyeli yaze yathumba abanye babo.

Numbers 21

Ukuchithwa kwe-Aradi

1 Kwathi inkosi yase-Aradi engu-mKhenani eyayihlala eNegebi isizwa ukuthi u-Israyeli wayesiza ehamba ngomgwaqo eqonde e-Atharimi, yabahlasela abako-Israyeli yaze yathumba abanye babo. 2 Ngakho u-Israyeli wenza lesisifungo kuJehova wathi: “Nxa unganikela lababantu ezandleni zethu, sizachithiza amadolobho abo nya.” 3 UJehova walalela ukuncenga kuka-Israyeli wasewanikela amaKhenani kubo. Abako-Israyeli bawaqothula amaKhenani bachithiza kanye lamadolobho awo; ngakho indawo leyo yabizwa ngokuthi yiHoma. Inyoka yeThusi

4 Bahamba besuka eNtabeni yaseHori ngendlela eqonda eLwandle oluBomvu, ukuze baceze ilizwe lase-Edomi. Kodwa besendleleni abantu basebenengekile sebephelelwe yikubekezela; 5 bakhuluma kubi besola uNkulunkulu kanye loMosi, bathi, “Lasikhuphelani na eGibhithe ukuze sizefela enkangala? Akulasinkwa! Akulamanzi! Futhi lalokhu ukudla kwenu okubi siyakuzonda.”

6 Ngakho uJehova wasebathumela izinyoka ezilobuhlungu obubi kakhulu zabaluma abantu bako-Israyeli abanengi bafa. 7 Abantu baya kuMosi bathi, “Sonile ngokukhuluma kwethu kubi ngoJehova langokukhuluma kwethu ngawe. Akukhuleke ukuthi uJehova asuse izinyoka lezi phakathi kwethu.” Ngakho wabakhulekela abantu.

8 UJehova wathi kuMosi, “Yenza inyoka yethusi uyiphanyeke esigodweni; loba ngubani olunyiweyo angakhangela kuyo uzaphila.”

9 Ngakho uMosi wenza inyoka yethusi wayiphanyeka esigodweni. Kwakusithi lowo olunywe yinyoka angakhangela inyoka yethusi aphile.

Uhambo lokuya eMowabi

10 Abako-Israyeli basuka baqhubeka baze bayamisa izihonqo zabo e-Obhothe. 11 Basuka njalo e-Obhothe bayamisa izihonqo zabo e-Iye Abharimi, enkangala eyayimalungana leMowabi ngokuya ngempumalanga. 12 Besuka lapho baqhubeka ngohambo baze bayamisa izihonqo zabo esiGodini saseZeredi.

13 Basuka lapho bayamisa izihonqo zabo eduze le-Anoni, esenkangala efika elizweni lama-Amori. I-Anoni isemngceleni welaseMowabi, phakathi kwe-Mowabi kanye lama-Amori. 14 Kungakho iBhuku leZimpi zikaJehova lisithi: “ … iWahebi eseSufa kanye lezindonga, i-Anoni 15 kanye leliwa lezindonga elehlela endaweni yase-Ari njalo lisekele umngcele waseMowabi.”

16 Besuka lapho baqhubeka baze bayafika eBhiya, emthonjeni lapho uJehova athi kuMosi, “Buthanisa abantu ngibanike amanzi.”

17 Ngakho u-Israyeli wahlabela ingoma le ethi: “Mpompoza, wemthombo! Hlabelelani ngawo,

18 ngomthombo owenjiwa ngamakhosana, owenjiwa yizikhulu zabantu – izikhulu ezilezintonga zobukhosi kanye lezinduku.” Basuka-ke enkangala bayafika eMathana.

19 Besuka eMathana baya eNahaliyeli, besuka eNahaliyeli, baya eBhamothi, 20 kwathi besuka eBhamothi baqonda esigodini eMowabi, lapho isiqongo sentaba yasePhisiga esikhangele elizweni elilugwadule.

Ukwehlulwa kukaSihoni lo-Ogi

21 U-Israyeli wathumela izithunywa kuSihoni inkosi yama-Amori wathi:

22 “Sivumele sidabule elizweni lakho. Kasiyikuphambukela loba lakuliphi icele ukuze singene loba yikuwaphi amasimu akho kumbe isivini, loba ukunatha amanzi emthonjeni loba yiwuphi. Sizazihambela nje ngomgwaqo omkhulu kaJehova size sedlule elizweni lakho.”

23 Kodwa uSihoni kavumanga ukuthi u-Israyeli adabule elizweni lakhe. USihoni waqoqa ibutho lakhe waphuma waqonda enkangala ukuyahlasela u-Israyeli. Wathi esefikile eJahazi walwa lo-Israyeli. 24 Kodwa u-Israyeli wamnqoba ngenkemba, wambhubhisa njalo wamthathela ilizwe lakhe kusukela e-Anoni kusiya eJabhoki, kusiyafika elizweni lama-Amoni kuphela, ngoba umngcele walo wawuvikelwe ngemithangala. 25 U-Israyeli wathatha wonke amadolobho ama-Amori wahlala kuwo, kwakugoqela iHeshibhoni kanye leziqinti ezaziyigombolozele. 26 IHeshibhoni kwakulidolobho likaSihoni inkosi yama-Amori, owayelwe lenkosi yamaMowabi eyayikade ibusa khona wayinqoba wayithathela ilizwe layo lonke kuze kuyefika e-Anoni.

27 Kungakho izimbongi zisithi: “Wozani eHeshibhoni; kayivuselelwe yakhiwe njalo; akuthi idolobho likaSihoni livuselelwe.

28 “Umlilo wavutha eHeshibhoni ilangabi lavela edolobheni likaSihoni. Laqothula i-Ari laseMowabi, abantu basemiqolweni yase-Anoni.

29 Maye kuwe, Mowabi! Selibhujisiwe lina, O bantu baseKhemoshi! Usedele amadodana akhe njengeziphepheli lamadodakazi njengabathunjiweyo bethunjwa nguSihoni inkosi yama-Amori.

30 “Kodwa thina sibehlule; IHeshibhoni siyitshabalalisile kuze kuyefika eDibhoni. Sibachithile kwaze kwaba seNofa efinyelela eMedeba.”

31 Ngakho u-Israyeli wahlala elizweni lama-Amori.

32 Ngemva kokuba uMosi esethumele izinhloli eJazeri, abako-Israyeli bathumba iziqinti eziseduze njalo baxotsha ama-Amori ayehlala khona.

33 Basebephenduka bahamba ngomgwaqo oya eBhashani. U-Ogi inkosi yaseBhashani kanye lebutho lakhe lonke baphuma ukuyahlangana labako-Israyeli ukubahlasela e-Edreyi.

34 UJehova wathi kuMosi, “Ungamesabi, ngoba sengimnikele kuwe, lebutho lakhe lonke kanye lelizwe lakhe. Uzakwenza kuye njengalokho owakwenza uSihoni inkosi yama-Amori, owayebusa eHeshibhoni.”

35 Ngakho bambulala, ndawonye lamadodana akhe kanye lebutho lakhe lonke, kakho loyedwa owaphephayo. Basebethatha ilizwe lakhe.